Samstig: Nach de lange Fahrt mit Zug und Bus erwartet eus wunderschöns Wetter in Splüge. Nachdem sich all mal hend müese uszieh und verpflege vorem Lagerhuus und d’ sunnecreme scho umegreicht worde isch, hemmer denn endlich chene los. Die ersti Tour! Ganzi 100 Meter (villicht au eher 50) simmer de Berg ufegloffe; Stop!
Zersch mal all kennelerne und denn uf de glichi Lawine-Notfall-Stand bringe. So, jetzt simmer parat fürd Wuche, es paar scho mitem erste Sunnebrand und wohlgenährt nachem köstliche Znacht. Mit so vill Sunne hed die Wuche gsartet und isch genauso au wiitergange: Vill Sunne, vill Freud und wenig Schnee. Das mitem Schnee isch halbso wild gsi – Da wo anderi scho nur no Gras gseh hettet, hend mir no de letschti Schnee gfunde und mer munklet, dass de Bergfüehrer Rolf sogar zimli vill Powderhäng gfunde hed. So sind Tag für Tag alli Gruppe wieder en neue Hang durufgstampft oder grutscht und hends sogar es paar Mal gschafft zemme Pause z mache. (Pause mues mer sich überigens ihfordere, susch gend sie schnell mal vergesse.) Nebst ere kabutte Splidboardbindig und es paar Stürz hemmer zum Glück kei wiiteri Ihbuesse müese mache. So isch no gnueg Ziit blibe für es Fiirabigbierli mitme Tichu oder s’Herzstück vom Campingplatz: D’Sauna. S’gid sogar en Prosecco dezue (je nach Person, wo grad ah de Rezeption sitzt) und s’Schneebänkli dusse isch super zum de Sternehimmel gnüsse währendem abchüele. Alles in allem eh sehr glungeni Wuche – Ich bin sicher mir hend s beschte drususe gholt!
Pause kollektiv:
Das isch es e Pausekollektiv.
Und sind mir zeme uf tour,
neh’nd mir’s immer mit de Rueh.
Sind di letzte uf em Berg,
doch bring das üs nid it Särg.
Mir gsehnd das nid so negativ…
Mir sind em Pausekollektiv.
Und laufed mir de berg duruf,
chömmer schnell mol us em schnuuf.
Also sitzed mir in Schnee,
gönned üs es Tässli Tee,
Gsehnd das alles nid so stief…
Mir sind es Pausekollektiv.
Und isch die Pause denn verbi,
schwinged mir üs denn uft Ski.
Laufed los de berg durue‘
doch nehmeds immer mit de rueh,
und mached definitiv…
Nomol e Pausekollektiv.