(Meist trockene) Felsgrate im Baltschiedertal – 25.9.-29.9.2021
Bi schönstem Wätter isch üsi bunt zämegwürfleti Gruppe am Samsti, 25.9. z Ausserberg usem Zug gstige. Bunt zämegwürflet insofern, wöus Lüt vo 22 bis 31 het gha, Lüt usem Bärnbiet, Züri und so witr (wobi Zwöiteri eher in Überzau si gsi) und es si nidemau aui vor Pfadi gsi, wime bi somne Mountainscoutslager chönnti meine…aber mir vor Pfadi si ja tolerant…😉
Mir si de a däm Tag zum Stockhornbiwak ufegloffe. Üse grösste Motivator isch nid dr Bärgfüehrer Jonas gsi – obwou dä si Job (abgseh vom vergässene Gstäutli) super het gmacht – nei es si di viele «Heiti» (Heidelbeeren) gsi, wo überau am Wägrand si gwachse. So heimr mit üsne Müler und Häng scho mitem Motto «Suberkeit wird überbewärtet» chönne i di Wuche starte. Im Stockhornbiwak heimernis de nöcher kenneglehrt – sozial und rüümlech. Nume so viu: Zum Glück hei ono es paari ghoufe choche, wöu nume so hets einigermasse gnue Sitzglägeheite und Platz fr di angere gäh…
Am erste Tag heimr de grd e «Iistigstour» ufe erst Turm vom Stockhorn gmacht. So easy isch de di Iistigstour am Schluss doch nid gsi, wöu z Wätter hetnis bim Abstieg nidso nätt behandlet – villech wägdr Helen, wöu si am Aafang vom Lager het gseit, dssi no mau e Schneesturm wett…? Jedefaus simr guet und troche aacho, aber bim Abstig hets nis dermaase verchutet und verschiffet, dsmr de gottefroh si gsi, widr im Stockhornbiwak zsii. Abr nei, üse Tag isch denn no nid fertig gsi, mir si när no id Baldschiederklause gloffe. Ds het aber när dr Vorteil gha, dsmr dert de aui üsi Sache richtig schön hei chönne usbreite (respektive dr ganz Rucksack uf einisch hei chönne uslääre, wis dr Nino aube pflegt zmache) und vor Jolanda es feins Znacht hei becho – sogar mit gnue Stüu für aui zum Hocke!
Am nächste Morge isches de am 6i los gange i richtig Baldschiederhorn. So am früeche, chaute Morge isches (mi chas nid angers säge) huere glatt gsi uf dene Gröllfälder…ds het zu einige unschöne Stürz gfüert. Zum Glück si aber aui no glimpflech usgange. Dobe aacho het de scho widr eis vode Gstäutli gfäut, dasmau nid das vom Jonas sondern das vom Tornado – das mitdr Vorbildsfunktion het da somit grad scho widr chli ghapperet 😉. Zum Glück het aber dr Jonas de gwüsst, wime us Schlinge etc. es Gstäutli cha «bastle», und mir Angere si aui froh gsi, dsmr ds nid hei müesse anneha… Z aaschliessende «Kraksle» isch de für es paar Teilnähmendi scho meh id Definition Chlättere übergange – was aber sehr Spass het gmacht und am Schluss mitemne super Usblick ufem Gipfel und ere super Rösti vor Jolanda ir Hütte isch belohnt worde…😊
Bir Tour ufz Breitlauihorn am nächste Tag hetme de scho im Vorus chli gwüsst, ws mit «Kraksle» gmeint isch – mir si nachdr Gletscherüberquerig (wo schön, aber gar nid so spannend wi erwartet isch gsi) no feiechli klätteret (odr äbe krakslet) und hei dobe aacho ziemlech lang chönne di superschöni Ussicht gniesse. Am Morge denn heimr zwar nid mit veriisete Steine z Kämpfe gha, drfür mit glattgschlieffene Platte, wo teu wines Gemschi si ufegloffe und teu äbe weniger…
Pünktlech ufe letschti Tag isch de zWätter widr schlechter worde. Am Sächsi am Morge im Dunkle im Näbu isch sowohl frd Mehrheit, wosech iz Lötschental ufgmacht het und die, wo grad direkt abe uf Usserberg si gloffe, e aaspruchsvolli Usgangslag gsi. Es si aber de am Schluss aui heil und mit vielne spannende und schöne Erläbnis im Chopf dunge aacho. Und z Highlight vom däm Tag isch äue für aui di warmi Duschi gsi, wome no di letschte Überblibsel vo de Heiti het chönne entferne. …und iz blibt eifach numeno es grosses Dankeschön a auii Organisatore und Leitigspersone, wo ds hei müglech gmacht!