Einsteiger:innen Hochtourenweekend

Achtung: No unbekannti Art uf Hochtoure gsichtet

Nachde erste hochtourige Kurve mitem Auto bis zude Sardascahütte (1650) undeme steile Ufstieg zude Silvrettahütte hemmer oises Privatquartier ide Winterhütte grad mitsamt de Mountainscoutsfahne bezoge. De ersti Tag het nachher vor allem eis botte: e umfassendi Ifüerig is Chlettere im Chlettergarte. Dadevo blibt ois wohl nöd nur die eimalig Stewardess-Vorzeigeaktion in Erinnerig, sondern au zahlrichi Chnöpf und Chlettertechnike. Am zweite Tag, wos langsam ghellet het, hend sich drü Seilschafte ufde Silvretta-Gletscher gwagt, was mitere erste Chragselaktion ufs Egghorn sin Höhepunkt gfunde het –dicht gfolgt vom durabrenne im Schnee und de Besichtigung vode Gletscherzunge. Früener retour als denkt, hend am Namitag nachde Rösti und de Wähe di einte duschet, di andere nachere wiitere Chletterlektion es Isbad im Fluss gno. Und wils scho de letzt Abig gsi isch, hemmer all innere gmüetliche Rundi de Tag usklinge la. De Mäntig het denn mit «Usschlafe nach Hüttestyle» agfange: Am 6:30 Uhr het sich di munteri Truppe ufde Weg ufs Tällihorn und aschlüssend de Medjichopf gmacht – mit weniger Iis defür me Chlettere und ab und zue hüfttüüf im Schnee isinke. De strahlend blau Himmel het schlussendlich wieder dune so einigi Füess in chalte Brune und a die alpetauglich Sirupbar glockt.

– wiiterlese ab da uf eigets guetdünke –

Sie chömed vo z’underst ufe und wend höch use: di sibe Hochtoure-Istigende mit ihrem Powerquartett-Leitigsteam. Wemmers statistisch wett, wär das es 4:7 Betreuigsverhältnis, mit de übliche 9.09% Verlustquote wo nur 1/3 Gipfel erreicht het, wärend de Rest tatsächlich insgesamt 4270 Höhemeter ufe und abe gmacht unds Egghorn (3147), de Tällispitz (2842) und de Medjichopf (2478) erklumme hend. Usserdem hend sie 1 Silvrettagletscher und 1 Chlettergarte bestiege, 6 Röstis und 7 Chässchnitte, 10 eier und 2ne ihres Traummenü Pizzoccheri verdruckt und 3 Paar nassi Schueh und 4 Paar Holzklompen treit, plus je 1 Triangel bi 5 Gamasche becho…

Aber will Zahle bekanntlich nöd alles sind, gits es paar Sache wo nöd abschlüssend klärt sind: D’Frag, was ez als Hochtour gilt, isch offiziell relativ: Bruchts en Gletscher, bruchts richtige Material (was natürli di ander gross unabgschlosse Diskussion isch) oder bruchts doch eifach «me als e wanderig»? D’Frag, wiemers schafft, dass im Öko-WC vode Silvrettahütte kei Abfall landet, d’Frag, wiemer d’Welt chönd zumne fridlichere Ort mache, und d’Frag, wo ez eigentlich de Gletscher afangt – oder ufhört? Wie au immer.

Mer hend jedefalls vill glernt:

wenn du Berge versetze willsch, muesch eifach heel sterk geloooven
Tröchneti Cranberry bestönd nur zu 60% us Cranberry
Eimal Top Rope, bim Vorstigschlettere hinedri chlettere, sich selber abseile, sich selber usere isspalte rette miteme Microtrax (wo am Seil nöd mit jedem Karabiner glich guet tuet)
Es git Bäre, Wölf, Delphin und Loie als Schlaftype, wobi d‘ Loie ide Gsellschaft und ersch recht uf Hochtoure als Früeufsteher ganz klar im Vorteil sind
Wer lernt absichere, brucht am Afang no en Schutzängel
Gwüssi Lüüt teiled sich all ihri Exe
Anderi chaufed sich zum kompensiere eifach e nigelnagelneui Skitoureusrüstig
Das en usschlaggebende faktor vom Schnuder d Viskosität isch (d‘ Zähflüssigkeit) und dasses euphemistisch (verharmlosend) isch, vom Silvrettahorn (3243) als Hügeli zrede
Tritt in Schnee schla, Isschrube setze, Front- und Ganzfuesstechnik mitde Stiigise laufe (s normale Laufe zeigt au no Üebigspotential)
S ABC wie mer innere Seilschaft sini Gspänli cha nerve
Chnüppel sind au Chnote: Mastwurf, Halbmast, Achter und Spierenstich grad dopplet, Prusik, Weiche, Füerer & Füererinne, Leitere…

Nur isch no unklar i weles soziale Milieu (nach Bourdieu) ez die überglückliche 7 Nase ghöred, wo s Hochtoure-Istigsweekend hend derfe gnüsse und ez miteme Sack voll Erfahrige und me Herz voll Erinnerige wieder im Underland ihres Unwese tribed. En ganz grosse Dank jedefalls a di unglaublichi Begeisterig und Expertise vom Leitigsteam ad Flavia, d’Capretta, de Tornado und de Fabian.